طريقه العصيده

طريقة العصيدة :

أول شي تاخدوا طنجرة حجمها مناسب لعدد أفراد الأسرة وتحطوا فيها امية أكثر من ربعها شوي تقريبا ،، والملح حسب كمية المية وراكم تديروها سامطة ، وبعدها تخلوها تغلي وتنزلوا الطنجرة ومباشرة بعد ما تنزلوها تصبوا فيها دقيق بالشوي بالشوي مع التحريك بالمغرف
(اللي زمان أمكم كانت تضرب فيكم بيه في الطرايح لما كنتوا صغيرين
)، وتصبوا الدقيق بالتدرج مع التحريك السريع لغاية ما تتماسك العجينة وتولي شادة روحها وراكم تصبوا هلبا دقيق لين تولي زي الحيط ،،، وبعدها تصبوا عليها كمية مناسبة من المية اللي تغلي في الطنجرة الثانية واللي مفروض تكونوا حاطينها عالنار حتى هي في نفس الوقت اللي حطيتوا فيه الأولى والا بعدها بشوي ، وتديروا في العجينة كم فتحة بالمغرف يعني كأنكم تقسموا فيها لمجموعة قطع ، وتحطوها عالنار الهادية لمدة عشرة دقايق إلى ربع ساعة تقريبا ، وبعدها تعاودوا تحركوها مرة تانية ( يعني تعصدوها ) ، وتحطوها في الصحن المدهون بالزيت والا الزبدة ، وتاخدوا العصيدة الطايبة اللي في الطنجرة وتحطوها في الصحن وتساووها وكل مرة بللوا يديكم بمية باردة باش ما تكويكمش ، وبعد ما تتساوى حطوا فوقها سمن والا زبدة والا زيت زيتون حسب الذوق ، وفوقهم عسل والا رُب برضو حسب الذوق ،،


وهذه صور العصيدة اللي أمس درتها مش عارفة شنو خطرها عليا جت في خاطري مع إني ليا تقريبا أكثر من سنة ما درتهاش لين نحساب روحي نسيتها ، وفرحت لما طلعت حلوة :

إليكم الصور :

عصيدة بالرب:



عصيدة بالعسل:



ومقصودة ما كثرتلهاش من السمن لأنه كله كلسترول ، بس لو تبو تكثروا على راحتكم لكن راهو مش باهي يترسب عالشرايين قالوا ، وعموما عندي الزبدة أحسن في العصيدة بس أمي تفضل السمن لذلك درتها بالسمن .


وصحتين وعافية للجميع .