نكت واضحك للصبح

مرة واحد بيروح بيتة كل يوم سكران
قام من النوم الصبح وقال لمراتة انتى يا ولية كل يوم تسيبى نور الحمام منور
مراته ردت عليه اتنيل انت اللي كل يوم بتخش الثلاجة

مرة 3 أطفال راحوا محل لعب، واحد فيهم بيقول للراجل: عمو عمو عايز بلونة.
الراجل جاب السلم وطلع وجابله بلونة ونزل
فسأل التاني: وانت عايز ايه؟
قاله بلونة .. فقاله الراجل ماقلتش ليه وانا فوق!!
المهم طلع جابهاله وهو فوق سأل الولد التالت: وانت كمان عايز بلونة؟؟؟ قاله لأ...
فنزل الراجل وقاله : امال عايز ايه؟ قاله عايز بلونتين

مرة واحد غبى واقف في الشارع و بيتكلم في المحمول
و عمال يزعق و يقول: بس دوري تاني ، دوري كويس.
ام واحد معدي في الشارع جه قال له: في إيه ؟؟؟؟
مردش عليه
راح واخد المحمول منه وبيسمع ... لقى .... (الرقم الذي طلبته غير موجود في الخدمة)!!!!

مدرس حساب سأل طالب لو كان علي أبوك دين 1000جنيه
و مطلوب انه يسدده علي 10 أقساط ها يدفع كام في كل قسط؟
رد الولد مش هايدفع ولا مليم ...
فقال المدرس : اقعد يابني ده انت مش فاهم الدرس كويس...
فرد الولد : ده انت إللي مش فاهم بابا كويس يا أستاذ

واحده ست مسكت حرامى فى المطبخ ،فقالت لابنها روح إنده ابوك من على القهوة....
جه ابوه ، ولما فتح المطبخ لقي الحرامي صغيّر فقال له انت اسمك ايه؟ قالوا كريم
فقعد يضرب فيه لحد ما عجنه ....
تاني يوم الست بتفتح باب المطبخ لقيت حرامي
قالت لابنها روح يا وله نادي ابوك من على القهوة
جه الراجل ولما دخل المطبخ لقي واحد طول بعرض .......
بص لمراته وقال لها امال فين كريم ؟!!!

مرة واحد صعيدي عالم بيعمل تجربة علي ضفدعة،
قام قطع الرجل الأولى و قال لها "نطي" فنطت،
فكتب ملاحظة "عند قطع الرجل الأولى للضفدعة فإنها تنط".
قطع الرجل التانية و قال لها "نطي" فنطت،
كتب ملاحظة "عند قطع الرجل الثانية للضفدعة فإنها تنط".
قطع الرجل التالتة و قال لها "نطي" ما نطتش
فكتب ملاحظة "عند قطع الرجل الثالثة للضفدعة فإنها تفقد حاسة السمع".

بخيل سألوه "لو كنت بردان تعمل إيه؟
" قال "أقرب من الدفاية"، قالوا له "و لو زاد البرد؟"
قال "أقرب أكتر"، قالوا له "و لو زاد البرد أكتر و أكتر؟"
قال "أقرب أكتر و أكتر"، قالوا "و إذا البرد زاد أكتر و أكتر و أكتر؟"
فقعد يفكر شوية و قال لهم "أشغل الدفاية"

واحد بيقول لصاحبه تيجى نركب اتوبيس؟؟
قال له : يا عم لأ ، احنا نجرى جنب الاتوبيس ونوفر النص جنيه ....
فرد وقال له طب منجرى جنب تاكسى ونوفر خمسة جنيه

واحد بخيل اوى. صحى من النوم مراته بتقوله هتفطر ايه
قالها هم بيضتين يا ام احمد بيضتين مسلوقين واحدة ليكى وواحدة ليا
تعمليهم على ما اطلع ازبط الاريال
المهم طلع وهو فوق اتشنكل وقع من السطوح
وهو بيقع بيزعق جامد اوى (( بيضــــــــــــة واحدة يا ام احمــــــــــــــــد ))

كان فى مسابقة بين ثلاثة أشخاص ,
المسابقة كانت إنهم يعدوا البحر ويطلعوا الجبل و يقتلوا الغوريلا و ينقذوا الأميرة ...
اول واحد غرق فى البحر ،
ثانى واحد عدا البحر لكن وقع من فوق الجبل....
أما الثالث (كان غبى شوية) عدا البحر وطلع الجبل وقتل الأميرة ..... و أنقذ الغوريلا

مرة واحد بيعدي الشارع مع صحابه خبطته عربية مات.
أصحابه نقوا واحد منهم عشان يقول لمراته انه مات
فراح لها فتحت له الباب قال لها: "جوزك ضيع كل فلوسه ع القمار"
قالت له: "إلهي يتشل البعيييد!"
قال لها: "و باع البيت"
قالت له: "إلهي يبيعوا عنيه!"
قال لها: "و اتجوز عليكي على فكرة"
قالت له: "إلهي يدخلوا عليا شايلينه"
الراجل قال: "بس..خشوا يا شباب..."

مرة اتنين مجانين الأولاني قال للتاني "تيجي نلعب لعبة الجزار؟ أنا الراجل الجزار و انت جاي تشتري"
قال له ماشي و وقف قدامه و قال له "عندك حاجة ساقعة؟"
الأولاني قال له "إيه ده يا عم دي لعبة الجزار، إنت باين عليك مش عارفها
بص انت خليك الجزار و انا جاي اشتري منك
" و وقف و قال له " عندك جبنة رومى
قاله: لا جبت القزايز فاضية

دكتور بيطرى بيقول لحبيبته : انا بهيم فى حبك ... تتجوزينى ؟؟
قالتله : أنا مقدرش أرفسلك طلب

واحد و مراته متخانقين فبطلوا يكلموا بعض،
الزوج كتب ورقة "صحيني الساعة 6:30 عشان عندي شغل"
و حط الورقة على السرير و نام صحي الساعة 10:00
فلقى ورقة مكتوب عليها "الساعة 6:30 يلا اصحى"

مدرس جغرافيا بيقول لواحد صاحبه : عندى واد فى الفصل جننى
صاحبه بيقوله : ليه
قاله : كل يوم هيموت ويعرف خط الاستواء كليك ولا موبينيل !!!

الابن:بتعمل اية يا بابا؟؟
الاب:بكتب جواب لعمك......
الابن:هو انت بتعرف تكتب؟؟!!!
الاب:يعني هو عمك اللي بيعرف يقرا

في واحد مفلس ومنحوس ماشي في الطريق
فلقى عربية عاملة حادثة
ولما شاف الضحايا، ففكر انه يقطع ودنه ويحطهاقدامه عشان ياخذ التعويض
وبعد ما عمل كده اكتشف انهم بيصوروا فيلم سينمائي.

حرامى اتجوز حرامية وخلفوا عيل صغير
العيل كانت ايده مقفولة
فراحوا للدكتور عشان يفتحها
لقوا فيها خاتم الممرضة

مره واحد بيسأل صاحبه عارف ليه الدكتور بيخبي وشه وبيحط كمامه وهو داخل غرفة العمليات ؟؟؟
فقال له ليه ؟
قال له علشان محدش يعرفه من اهل المريض لو العمليه منجحتش

محشش راح للدكتور قاله الدكتور أنت لازم تعمل إشاعة.....
خرج من الأوضة وقال الهرم وقععععع .. الهرم وقعععععععع

واحد كل ما يشوف متش كورة للفريق بتاعة . الفريق بتاعة يخسر .كل مرة على كدة .
لحد ما فى يوم قرر انه ميتفرجش على كورة تانى .
فكان فى يوم فى متش كورة للفريق بتاعة . و الفريق بتاعة جاب جون .
جة يتفرج على الجون فى الاعادة الجون طلع كورنر

واحد محشش ضرسه بيوجعه
راح لدكتور السنان وقاله
اخلع كل الضروس وسيب ده زى الكلــب لوحده !!!

سالوة ابو العربى:عندك كام سنه؟ قالهم:40.
سالوة بعد10سنين :عندك كام سنه ؟
قالهم:40.
سالوه اذاى بتقول ان عندك 40سنه وانت قلت كدة من عشر سنين؟
قالهم:اصل كلمة الراجل واحدة

مدرس عربى دخل الفصل قال النهارده حصة املاء ....
يا اولاد اكتبوا ورايا: ذهب حسام الى المصيف يوم الاربعاء..
راح ولد قام وقال لو سمحت يا استاذ هو الاربعاء همزة على السطر ولاّ على الالف ؟؟؟
فسكت الاستاذ شوية محتار .... وراح قايله خلاص يا بنى خليها الخميس

واحدة حامل فى 3 توائم , يوم الولادة راحت للدكتور
والدكتور بيطلع اول واحد لقاه مغمض عينيه
فضل يضربه لحد مفاق وركنه على جنب
التانى نفس الكلام وبرضو ركنه على جنب
فضل يدور على التالت ساعة مش لاقيه
فنده الممرضة قالها شوفى الواد التالت على ماجى
اول ما ممشى لقت الواد طالع بيوشوشها : هو الراجل اللى بيضرب العيال مشى

ثلاثه صقور اتراهنوا على الصيد راح الاول ورجع في منقاره دم قليل...
قال لزمايله شفتوا الشجره اللى هناك دى؟
قالوا أيوه قالهم انا اصطادت عندها أرنب ......
راح الثاني ورجع في منقاره دم كثير قال شفتو الصخره اللى هناك دى؟
قالوا أيوه قال اصطادت عندها غزال ....
راح الثالث ورجع وكله دم قالهم شفتوا العمود اللى هناك ده؟
قالوا أيوه قال أنا ما شفتهوش

<---- هذا العضو (( فاااااطس من الضحك ))
[ندعوك للتسجيل في المنتدى أو التعريف بنفسك لمعاينة هذه الصورة]

[ندعوك للتسجيل في المنتدى أو التعريف بنفسك لمعاينة هذه الصورة] يسلمووووووووووووووووووووا بجد حلوين

» نكت واضحك للصبح